SabahaYol
پاييز
اؤتدوكجه هر پاييز ،
گيلئيلي طالعيميزين چيچه يي،
آغلايا-آغلايا يولور ساچلارين.
اؤتدوكجه هرپاييز،
چهکیلیر آرزوموزون شهدي، شيره سي،
ديله گهلير ديلهك لهريميز:
بير پهتهك عؤمؤرو ، نئجه داديب ياشاديق...؟
هر پاييز...،
دومانلاردا ايتهن خاطيره لر-
اوزاقلاشير...، اوزاقلاشير...،
و نهايت ،
قارا سئچير گؤزلريميز .
منه بير منظره چهك ...،
یاریسیندا گۆنش كيمي یانان شاعير !
بير طرفده گۆنشه گۆلله آتان دووشانلار !!
گۆله-گۆله قال، سايين رسام...!
آنامين يايليغي !
آنا بير سئوگي دي نازدي،
آنا بير نغمه دي سازدي،
آنا باشدان باشا آنلامدي اؤركدي،
آنامين يايليقي بير چنگه ايپكدي-
غونچادي گولدو چيچكدي.
،،،،
آنا دردله باريشاركن ،قووشوب درده تاي اولدو،
گئجه-گوندوز چاليشاركن، وصفه سيغماز هاراي اولدو،
كؤرپهسي آدديم آتينجا ،هرگؤنو دوز بيرآي اولدو،
دارگؤنونده باشينين يايليقي نذر اولدو پاي اولدو-
فيكره دالديم بئله درد عاشيقي كيمدير ...؟
آنادير يوخسا حكيمدير...؟
آنا كيمدير؟ آنا كيمدير !
آنا ائل عاشيقي ائللرده بزكدي
او صاباحدي ، گلهجكدي .
،،،،
ائل آرا كينه عداوت يئر آلاندا،
سؤز-سؤزه باتماز اولوب قان قارالاندا،
قورخودان كؤرپه لرين باغري ساپاقدان قيريلاندا-
آنانين سون سؤزو يالنيز دانيشيقدير،
آنا صولح عسكري يايليق باريشيقدير ...
آنامين يايليقي ياردير ياراشيقدير .
،،،
گهل دئييم بيرده ائلين شانلي گونوندن،
توي گونو برلي -بزكلي او آل-الوانلي گونوندن،
باشي يايليقلي گلينلر، گلينه خونچا بزهرلر-
آنالار باشدا گزرلر ،
يايليقي دينگه ووروب تويدا سوزرلر...
سؤز قوشوب ماهني دوزرلر،
گول وئررلر گلينه ،
آنانين يايليقين عادتدي دولارلار بئلينه .
،،،
قوي دئييم بيرده ائلين قانلي گونوندن !
كئچميشيندن موغانين بير قارا داستانلي گونوندن،
دوشونولمز بيري خايين چيخاراق نفسه ساتيلدي،
آديني خان قوياراق، خالقا قاتيلدي،
اووا چيخميشدي بي گون بايرام آييندا ،
داياندي آرپا چاييندا-
گوردو بير نازلي گلين قاشلاري يايدي،
نه گلين سانكي بير آيدي،
تانريردان وئرگي دي پايدي،
دئدي بو نازلي گلين خانلارا تايدي...
،،،
باشي يايليقلي ساراي،سالدي هاراي !
باغري آليشدي ...
خانين ايرنج باخيشيندان جانا گلدي،
او ساراي كي يايليق اؤرتنده دييهردين آنا گلدي...
دردي بير-بير سانا گلدي،
سون گوروش ميدانا گلدي.
اؤزونو آرپا چاييندان آتاراق ديللره دوشدو،
ساري يايليقلي ساراي ماهنيسي محفيللره دوشودو.
اؤلكهيه ائللره دوشدو...
ياشادي يادداشيميزدا،
سئوينجده گوز ياشيميزدا-
آنا دونيا بويو سؤنمز بير ايشيقدير،
آنا صولح عسكري يايليق باريشيقدير.
ياشامي بير هايلي-هارايلي قاطاردي شاعرين.
يوكو آغلي-قارالي، بيرنئچه قوجاق شعير.
اينجه مقصدي ،
داش-دمير اوسته سورونور !
اوزون گئجهلره-
لايلاي چالا-چالا چيرپير، شاعير اورهيي .
ايچين يييهن قلمي-
آغچلنگلي گلهجكدن يازير .
اؤزو سئویلمهیهجکسه ده بيرگون،
سئوير ...، ياشادير .
شام كيمي اريييب،
كپنكلرين اوچوشو قدر ياشايير !
كيمدي شاعير؟
هارادي سونوجو بو يولون ...؟
اونو تانييم دييه-
قاچديم بو قاطارين آرخاسينجا ،
اۆزۆمه چيرپيلان گوزياشلاريني گوردوم !
چيچكلهنيب پؤهرهلهننده شعيري،
اوچدو آغزيندان كپنكلر ...،
يتيم قالدي كيتابي ،
"گويدن دوشن اوچ آلمادي" عؤمرو شاعرين .نوروزبايرامي گهلير ،
سئر-سئرا باغلاميش اۆرهیيميزده-
تونقال يانديراجاييق .
و ايشیغيندا-
قیفیللانميش كئفيميزين ،
آچارين آختاراجاييق …دوستوم... ،
گهل گئدهك اورمو گؤلونه،
يئنهده خاطيره شكيلي چكديرك .
نه اولاركي چارتلاييب دوداقلاري،
تهپيليب آغزينا پالچيقلار ،
و اؤپوشمور اؤز ساحيليايله دالغالار .
دوستوم ،
گهل گئدهك اورمو گؤلونه
بو دؤنه ،ساچلاريني اويناتماسادا كولهك لر،
آرخاسي اوسته قالان -
گميلر اؤنونده شكيل چكديرك .
ياديندامي دوستوم؟
بيز مينهن گمينين سرنشين لري ؛
و بير اوشاقين ماراغی :
" آنا...، دالغالاردا باتيب-چيخان گونشه باخ "
دوستوم ،
ايندي گل باتان گونشايله -
شكيل چكديرك !
بوراسي ، بايقوشلار يوواسي
"اؤلوم سمفونياسي" لا اوينايان قوزغونلار
ايچ هارايلاريندا بوغولان بولبوللر
يارالي دورنالارا يئريكله ين –
قورشونلار .
بوراسي جانسيخيجي شههر .
پاخيل-پاخيل پيللهلهنميش بينالار .
گؤزياشي آل-وئرچيلري ،
و قاش-قاباغلي دوكانلار .
آغلايير دامار-دامار كوچه لر ،
"عؤمرو-گونو يوللارا تؤكولموش" ، الي- قابارلي لارا
آغلايير ...
گنج-گنج سئوگي ديلنچيلرينه .
كؤزهرير ...
گنج اوغلانين سيگارئتينده شههر .
كؤزهرن شههر ايشيقلاناجاقمي ؟
يوخلاييب ياناقلاردا اننيك ، كيرشان
بۆزولموش دوداقلاري گيزلهدرمي بزك لر ؟
توولانير باشيما شههر ،
ائهئي ي ي ي ي گؤزياشي آل-وئرچيلري
"بازار اولسون ، بازار "
گؤز ياشلاري ،
قورشون ،
اننيك -
كيرشان ...
بوراسي ، بايقوشلار يوواسي .
ارييير داملا-داملا شاعير اورهيي ،
بۆكۆلور شئعير دفترينده ديلكلر ،
بو بازاردا ميثقال-ميثقال آغلاماقين -
يئري وارمي؟...
يئنه ده غم - كدر ايله دولوب قوجاقلاريميز
يهرلنيب قارا يئل لر، سونور اوجاقلاريميز
اوراقلانيبدي چيچك لر ،خبر يوخ آل بويادان -
ناخيشلاري بزه مير ساللانان ساچاقلاريميز
ايليم-ايليم بيز ايتيرديك اونوتدوق ائل- اوباني
پوزولدو يادداشيميزدان ايگيد قوچاقلاريميز
ائلئیكي بوغدو ساراني اوتاندي آرپا چايي ،
ياواش-ياواش قورودو گور جوشان بولاقلاريميز
حاصارلانيبدير اؤره كلر، قيفيللانيب قاپيلار،
اونو داها كهسه بيلمیر پولاد پيچاقلاريميز
كيتاب-كيتاب ناغيلايله شيرين-شيرين گئجه لر،
سيلينمهيير گوز اؤنومدن شيرين او چاغلاريميز
ديديم – ديديم داغيديلدي، ايپكلي يورد يوالار !
نه كهنه دام-باجالار وار ، نه بور-بوجاقلاريميز
" آرانلي" هر قارا يئلدن، دوغار بولودلو ياغيش ،
آشار، داشار قوشاچايلار، گولر اوجاقلاريميز ...بير مئلوديا چالير -
" ساري گلين "
گيزلي سيررين ، پرده لره دانيشير .
بارماقلارى سوزه-سوزه ،
گيتارانين تئللرينى سيغاللايير .
پيچيلداشير - پيچيلداشير
و آلينمير اؤرك سوزى ...
گؤز ياشلاري ،
ياناغينين اوسته آخير ...
ساري گلين ماهنيسي دا -
ياريمچيليق باشا چاتير !قورخوتما آنلاريمي ،
من گيلاس درمه يه يوخ ،
سيرغالاريمي آختارماغا گلميشم .
